يا مليك الملك اهدينا *** واحفظنا من كل غبينة

يا مليك الملك اهدينا *** واحفظنا من كل غبينة

قصيدة الوقتية.. للشاعر الشيخ عمر المقراني رحمه الله،والتى غناها أحمد صابر الوهراني رحمه الله 
روووووعة

يا مليك الملك اهدينا *** واحفظنا من كل غبينة

لا تصرف محاسد فينا *** يا عالم لسرار

ما باقي للخاطر بنة *** من الظلم لي جار

من شاو الدنيا بدالة *** تلعب بحوال الجهالة

عرَّت عيط ناس فحولة *** وسلاطين قدَّار

الساجي يولي للحملة *** قبل يروح اغبار

دارو صَفيَّة وجمايع *** شينين الرمة والطبايع

سبقونا في كل صنايع *** غير لي شفار

والرقبة في عمرو ضايع *** ما يكسب دينار

ما زالت تدور الساعة *** واتهرس اصحاب البدعة

من كان بجهلو يدَّاعا *** نخلف منو الثار

الرفعة لصحاب الرفعة *** يا ناس الحضار

لقيت اصحاب الخير يهسو *** في عقب الزمان نبخسو

وأهل العلم الزين انعفسو *** ساداتي لبرار

قابل حق قبيل وناسو *** من السيد عمار

عمر بن الخطاب الحفصي *** عادل عند احكامو حرصي

احكم على وليدو عاصي *** بحكام القهار

خلاه في لضرار يقاصي *** قتلو على العار

الظلم على الحق تولى *** واش يسلك يا رجالة

والديك على الطير تبلى *** بهذاك المنقار

خفق بالجنحان تعلى *** تاه على لطيار

روح اللحية والحشمة *** يا خويا ما باقي حرمة

ولات الحكمة للغشمة *** خرف سوق اكبار

باه تعاني يا ولد اما *** ما طقنا لنقار

في ذا الجيل قوات الكشفة *** والظلم على الحق تكلفا

ربحو فيه ذياب الخطفة *** عديان المختار

وتهنا كذا من عيفة *** كان الا مشرار

ولي كان قبيل بشانو *** ظاهر بيه الناس يعانو

تقصد الضياف مكانو *** مرتاح الزيار

قلبه لي بايع دينو *** من حطاب النار

يا خويا راني نستعظم *** ما نقدر بسرار نحمحم

راه القلب مريض مغيم *** بيه هموم اكبار

كاين بعض الناس بهايم *** يعدو الا قدار

آجي كان بغيت تقصر *** وانظر بعينيك استخبر

بذا الكلام تنجم تهدر *** عند العرب لحرار

راه اليوم الباطل صاير *** شفناه بلبصار
رجالة ونسا في جلسة *** مجتمعين وجوه البخسة

ويغنو لصحاب الرقصة *** يزهاو بلوتار

عاطيهم بليس الرخصة *** واولادو تجار

ابنات الاصول نحجبو *** خافو من ربي وعذابو

وبنات الرعيان نجلبو *** يمشو بالتشهار

فاتو الروميات وكلبو *** محاينهم اكبار

تمشط وتحرقص وتسوك *** تتدخل للبيرو تتريك

تصنع القعدة تتمولك *** كي شادي لقفار

متصحل ما قالو تسلك*** عاميها التكبار

ولات الغاشي مسلوبة *** كي تركو لبنات الحجبة

عرايا من فوق الركبة *** مطرح زوج شبار

نطلبو من الله التوبة *** واستر يا ستار

راحت الحرمة والشنا *** تركوها عديان نبينا

الطفلة تمشي عريانة *** ما باقيش ابكار

تستحوج وتيه علينا *** صفتها كالفار

كادت من قال أنا وأنا *** هذاك لي ينهي فينا

هو في قلبو يتمنى *** الدراهم بالقنطار

يفعل فعل كبير خيانة *** هذاك السحار

من قال الحجبة ممنوعة *** راه استهزا بالشريعة

حرمت عليه الشفاعة *** غره الغرار

هذي للكفار طبيعة *** يا ناس الحضار

اقرا في القرآن وحقق *** ما وصى ربي في السابق

من عندو ايمان محقق *** ذا حكم الجبار

من كذب احكام الخالق *** مقعده في النار

لعنة الله على الراجل *** لي طالق بنتو تتمريل

هو في الخيمة يتكسل *** وينحنح في الدار

ما يحشم لكان تبهدل *** ويعدوه خيار

افرح يا لي طالق بنتك *** مريولة لحكام تطيعك

وتقلو اقعد في الخيمة *** عنذ الذراري اصغار

ايكنبر ثمة كالهامة *** يتغطي بايزار

... يراعي ليها *** ومزعف بالغيظ عليها

هي زاهي مع صاحبها *** تشرب في البينار

يديها يا سي حوس بيها *** في سحل البحار

عمر بلمقران الناظم *** دايم في لشعار يعظم

طايع للسدات مسلم *** والطلبة لحرار

اغفر يا ...ربي
اسمعنا شي ناس تلوم *** غي لي فيه العيب تكلم

واصبح في القهوة يتفرضم *** ويشالي بيدين

بكلام الفصحى يتعظم *** عند المستحيين

كاين ثاني لي حسدونا *** سرقونا حتى قصيدتنا

وابغاو ايديرولنا فتنه *** مع المسؤولين

لاكن ربي هو طليبنا *** يكويهم في الحين

يا مليك الملك الدايم *** نجينا من كل ظالم

بحرمة طه بلقاسم *** تاج المرسلين

تحفظنا من القوم الظالم *** والمنافقين

هذا جيش بليس تقدر *** نزل محالو وتغزر

والعلم الشريف تأخر *** واحزاب الستين

نصروا علم بليس الكافر *** قوم الخبيثين

السنة والفرض الواجب *** تركوهم شينين المذهب

سولهم لكان تكذب *** هذا الشياطين

تجبرهم في كل مضارب *** يفسدوا في الدين

تاهت القوم الظولامه *** وتمسخروا بالعولامه

لي جعلهم المولى رحمه *** نور المؤمنين

وانتوما لجهنم *** رحتو خالدين

العالم مصباح ظلمة *** خليفة شفيع الأمة

يوريك الطريق المعلومة *** مصباح العينين

وانتوما قراكم لعما *** باليس اللعين

نجحت علوم الزندقة *** ظهرت عند اصحاب الشقا

وانساهم يجرو في الزنقة *** دايم مغرومين

الجايح مرتو مطلوقة *** غاشي مذلولين

الآصيلة تسنم *** صدقو بقول الله وحسنو

عمرهم لينا ما خانو *** دايم محجورين

وانتوما بغيتو تقرنو *** راكم مكشوفين

نشكر ابنات الرجاله *** لي خذيينا ابطال فحوله

وايخافو من عذاب المولى *** ما هم خداعين

وانتوما شينات الحاله *** راكم مغرورين

تلبس من اللباس القاصف *** مكشوفة من كل شوايف

تدخل للحفاف تحفف *** بروايح زينين

آجي كان بغيت تخرف *** لحم الصيد بنين

تخرج من ثما تتبختر *** تتنسم بروايح وعطر

تنظر للشبان تخير *** وتشابح بالعين

يدوها للساحل تسهر *** وتروق بلافين

يردوها وتجي تتنعنع *** من ينظر ليها يتروع

راجلها في الدار يقارع *** يتنهد وحزين

اتصيبو في البيت مقنبع *** تضربه مسكين

ويذا دار النيف تكلم *** اتزيده بالكف يسلم

يبقى للعدرة يتذمم *** يبكي بالعينين

اتقله راني نتقدم *** يا عوج الكرعين

بالاك ايذا كان تسالو *** جايح يغلبك بسالو

ويقلك انتا كي والو *** ويسبك بالدين

لو بيدي الحكمه نقتلو *** قتلة بالسكين

يخلص شهريتو ويسلك *** يديهم للريم قبالك

اتقلو ايدو محياتك *** رانا مخصوصين

لا تزعفشي كي نضربك *** يا سيد الوذنين

اتزين قدامو وتبدل *** واتروح تحوس كي تعمل

تخليه في الدار يخمل *** يغسل في المَّاعين

اتصيبه مسكين يشلل *** يرمي فالطاجين

كي يخرج بيها يهوالو *** يتققش قدام عيالو

يمشي ويدنق لخيالو *** يسحب روحه زين

جايح ما يحشم بفعالو *** واطباعو شينين

اشعال ولدتو من صابي *** يا بقرات بليس الزغبي

ذي تولد وذيك تربي *** ذرية شياطين

اعصيتو ربي والنبي *** وين تروحو وين؟

ذي تولد وذيك تقمط *** في ذاك لي زاد ملقط

ويقولوا شوفوا كي ناشط *** هذا الولد الزين

ايديرو باباه مرابط *** من الشرفة الزينين

كي يكبر يبدا يتلصص *** يصنع القصة ويحرقس

يتغيمز من تحت الدامس *** يشطح بالكتفين

ويقولوا كي يعرف يرقص *** ذوك العكليين

بزاف لي امو رباتو *** غير بلا تزويج ضناتو

من ولاد الزنا خطفاتو *** سال عليه منين

السيرة تعطيك نعاتو *** راضي فعلو شين

لي عندو بتنو مريوله *** يسبقنا في كل مسالة

يدخل وين ايحب قباله *** صاحب الوجهين

متوسل تال الرجالة *** يلغلو بالسين

كي يروحوا ليه الخطابه *** ايقوللهم ما زالت عزبة

ما زالت بنتي تتربى *** شوفوا ناس اخرين

تولدله في ذيك النوبة *** وتوم باثنين

ينطق بابها كالعرة *** يقوللهم ما زالت بكرة

شيخة في ليكول وتقرا *** تخلص خطرتين

يكفيكم من هاذي الهدرة *** راكم مخصوصين

ولاو ابنات الجهلية *** يستهزو بالعربية

يهدرو بالفرانسوية *** بيها مسلوبين

مافيهمش الآصلية *** يلعنهم آمين

ماشي غير ارواح تعلم *** يلزم المشياخ تسلم

هذا البحر عميق ملاطم *** سال القوالين

"عمار المقراني" نظم *** ناسو معلومين

****تمت ****
لمن يريد إستماع لها إليكم رابط على اليوتوب ، بإختصار أنه طرب الملتزم 
https://www.youtube.com/watch?v=sV0ktHwI43U